"Улаанбаатар төмөр зам" ХНН-ээс санаачлан, Дархан-Уул аймаг дахь “Хүүхдийн төмөр зам, сургалтын төв”-ийн дэргэд байгуулсан Монголын анхны хүүхдийн төмөр замын галт тэргийг өнгөрсөн оны аравдугаар сараас явуулж эхэлсэн билээ. Өвлийн улиралд үйл ажиллагаагаа түр зогсоогоод байсан тус галт тэргийг Дархан-Уул аймгийн “Миний монгол” цэцэрлэгт хүрээлэнд маргаашнаас явуулж эхлэх нь. Энэхүү галт тэрэг нь нийт 64 хүн суух хоёр вагонтой бөгөөд 2.2 километр төмөр замаар нэг удаа тойрохдоо 20 минут зарцуулдаг аж. Галт тэрэг даваа гарагт амарч, бусад өдрүүдэд цаг тутамд зорчигчдоо хүлээж авах гэнэ. Тасалбарын үнэ нь хүүхэд 3000, том хүн 4500 төгрөг юм байна.