Хаврын улиралд булаг, шанд гэсэж, шар усны үер болон халиа тошин үүсгэж, нийслэлийн зарим дүүргийн гэр хорооллынхныг хүнд байдалд оруулдаг. Өнөө жил цаг агаар тогтуун, цас харьцангуй бага унасан ч Сонгинохайрхан дүүргийн 26, 40 дүгээр хорооны нутаг дэвсгэрт нөхцөл, байдал хүндрээд буйг нийслэлийн ЗДТГ-аас мэдээллээ. Тиймээс Геодези, усны барилга, байгууламжийн газрынхан халиа тошинг арилгах ажлыг эрчимжүүлж байгаа аж.

Геодези, усны барилга, байгууламжийн газрын Далан сувгийн ашиглалт, засварын инженер Д.Ариунбаатар “Энэ хавар нийслэлийн зургаан дүүргийн 10 байршилд хөрсний ус нэвчиж, халиа тошин үүсгээд байна. Манайхаас мэргэжлийн баг гаргаж, одоогоор 8820 шоо метр сувгийг механикаар, 1700 гаруй метрт гараар суваг татаж, далан босгосон. Далангаас илүү гарсан мөсийг зөөж тээвэрлэсэн. Үүнд шаардлагатай 950 шоо метр хайлуулагч бодис, давс ил сувгуудад цацсан” гэлээ.