Хонконгийн удирдагч Кэрри Лам бүрэн эрхийн хугацааг дахин таван жилээр сунгахгүй гэдгээ өнөөдөр мэдэгджээ.

Өдөр тутмын “Ковид-19”-ийн талаарх ээлжит хуралдаанаар Лам шийдвэрээ ийн танилцуулж, Засгийн газар болон Гүйцэтгэх зөвлөл, баг хамт олон, гэр бүлийнхэндээ тууштай дэмжлэг үзүүлсэнд талархсанаа илэрхийлэв.

Тэрбээр дахин сонгуульд өрсөлдөхгүй болсноо гэр бүлтэйгээ холбон тайлбарласан. Хэвлэлийн хурлын үеэр Кэрри Лам “Би одоо гагц гэр бүлээ л бодно. Гэр бүлийнхэн минь миний хамгийн түрүүнд анхаарах зүйл гэдгийг өмнө ч хэлж байсан. Тэд минь ч намайг гэртээ ирэх болсныг сануулж байгаа" гэжээ.

Хонконгийн Засгийн газрын удирдагчийн дараагийн сонгууль тавдугаар сарын 8-нд болох юм. Ирэх сонгуульд Кэрри Лам Хонконгийн удирдагчаар дахин сонгогдох нь тодорхой байсан ч ийнхүү сайн дураараа “суудлаасаа” татгалзжээ.

Түүнийг суудлыг хотын хоёр дахь том албан тушаалтан болох Ерөнхий нарийн бичгийн дарга Жон Ли залгамжилж магадгүй гэх таамаглал байгаа аж. Түүнийг Хотын даргын сонгуульд өрсөлдөхөөр ажлаа хүлээлгэн өгнө гэх яриа гарсан ч Лам “Одоогоор ямар ч албан тушаалтнаас огцрох өргөдөл хүлээн аваагүй” хэмээн мэдээлэв.

Эх сурвалж: SCMP