Ерөнхий боловсролын сургуулийн төгсөх ангийнханд зориулж “Хаан” банк тэтгэлэгт хөтөлбөрөө зарлажээ. 2006 оноос эхлэн хэрэгжүүлж буй тус хөтөлбөрт 21 аймаг, Сэлэнгийн Зүүнхараа сум, нийслэлийн Багануур дүүргийн сургуулийн төгсөх ангийнхан хамрагдах боломжтой. Сурагчдын нийгмийн идэвх болон сурлагын амжилтыг харгалзан 60 хүүхдэд тэтгэлэг олгох юм байна. Тэтгэлгийн шалгуур нь голч дүн 85 хувь ба түүнээс дээш, сүүлийн хоёр жилд олимпиад болон уралдаан тэмцээнд амжилт гаргасан байх аж. Мөн “Монгол Улсад оруулах миний хувь нэмэр” сэдвээр 500-гаас дээш үгтэй эсээ бичиж, бусад шаардлагатай бичиг баримт бүрдүүлнэ. Тэтгэлгийн материалыг энэ сарын 17 хүртэл бүртгэх юм байна.