“The Voice of Mongolia 2022” шоуны III улирлын “The Knock out” шатны өнөөдрийн дугаарт шүүгч, дасгалжуулагч Д.Уламбаярын багийнхан тэмцээний "салхийг хагалсан". Харин шоуны сүүлийн хагаст шүүгч, дасгалжуулагч Д.Отгонбаярын багийн шилдгүүд хүч сорьцгоов. 

Дуурийн дуучин Ч.Ану "Дайчид" багийн үзүүлбэрийг хүчирхэг хоолойгоороо эхлүүллээ.

Эрч хүчээр бялхан байдаг, цохиур хөгжимчин Д.Бямбасүрэн реппэр Cardi B-ийн "Up" дууны өвөрмөц хувилбараар үзэгчдийг "цэнэглэв".

Уулзаж чадалгүйгээр олон жилийн өмнө алдсан хайрт эгчийгээ бодон, дуулсан Г.Даваадалайгийн дуу үзэгчдийн сэтгэлийг хөндөж, зүрхийг шимшрүүллээ. 

Цоглог оролцогч Д.Санчирмаа "1, 2, 3" дуугаараа авьяаслаг дуучин төдийгүй үглэх чадвартайгаа харуулсан. Энэхүү үзүүлбэр нь шүүгчид болон шүтэн бишрэгчдийнхээ бахархлыг төрүүлэв.

Дүрэлзсэн хоолойт А.Уянгын далайн түрлэг адил хүчирхэг үзүүлбэр нь  Д.Отгонбаяр шүүгчийн "The Knock out" шатны хаалтыг гал цогтой хийв.

"The Voice"-ийн тэнгэрт шүүгч, дасгалжуулагч Д.Отгонбаярын багийнхан оч маналзуулсан үдшийг бэлэглэсэн. Гэвч дүрмийн дагуу хоёр оролцогч шоуг үргэлжлүүлэхээр тодорсон нь  Г.Даваадалай, А.Уянга нар байлаа.