Төрийн шагналт, Ардын уран зохиолч Б.Лхагвасүрэнгийн “Тамгагүй төр” эргэн ирлээ. Физикл драм хэлбэрээр шинэчлэн найруулсан тус жүжгийг Улсын драмын эрдмийн театр, Үндэсний урлагийн их театр, “Hero” энтертайнментийнхан хамтран бүтээжээ.

Жүжгийг Б.Баатар найруулсан бол уран сайхны удирдагчаар Урлагийн гавьяат зүтгэлтэн Г.Цоггэрэл, зөвлөх продюсерээр Урлагийн гавьяат зүтгэлтэн Д.Цэрэнсамбуу нар ажилласан байна. Бүжгийг Урлагийн гавьяат зүтгэлтэн Д.Баярбаатар, Х.Хашхүү нар дэглэж, хөгжмийг Урлагийн гавьяат зүтгэлтэн М.Бирваа, Б.Одбаяр нар зохиосон аж.

Ардын жүжигчин П.Цэрэндагва, Гавьяат жүжигчин У.Уранчимэг, С.Болд-Эрдэнэ, жүжигчин Г.Эрдэнэбилэг, О.Дөлгөөн, Ш.Доржсүрэн, Б.Шинэбаяр нар дүр бүтээсэн юм.

Шинэчилсэн “Тамгагүй төр”-ийн үйл явдал уламжлалаараа өрнөх боловч дүрүүдийн үг, үйлдэл, сэтгэл хөдлөлийг бүжгийн хөдөлгөөн, уран сэтгэмжтэй хослуулснаараа онцлог болжээ. Мөн хөдөлгөөнт тайзыг археологийн олдворын дүрс, зургаар чимэглэсэн нь Хүннүгийн үеийн хааны ордонд зочилсон мэт мэдрэмж төрүүлэх аж.

Жүжгийг Улсын драмын эрдмийн театрын тайзнаа ирэх лхагва, пүрэв, баасан гарагт толилуулна. Тасалбар нь 40-180 000 төгрөгийн үнэтэй юм байна.