Нийслэлд энэ долоо хоногт сонгодог урлагийн болон нийтийн дууны хэд хэдэн тоглолт болох юм байна. Тухайлбал:

-Дуурь бүжгийн эрдмийн театрын тайзнаа ирэх амралтын өдрүүдэд  “Modern and musical night” сонгодог урлагийн тоглолт болох аж. Тоглолтын эхний хэсэгт модерн балет толилуулах бол дараа нь сонгодог мюзикл тоглоно.

-Улсын филармонийн симфони найрал хөгжим үүсэж хөгжсөний 65 жилийн ойд зориулсан “Сонгодог үдэш” тоглолтыг баасан гарагт толилуулна. Тоглолтын удирдаачаар Б.Батбаатар ажиллаж, гоцлол хөгжимчин нь төгөлдөр хуурч А.Энх-Амгалан байх аж. Тэд Галина Уствольскаягийн төгөлдөр хуурын концерт, Ж.Бизегийн “Кармен” дуурийн чуулбар хөгжим зэрэг бүтээл сонордуулах гэнэ.

-Туркийн Анкарагийн Хөгжим, дүрслэх урлагийн их сургуулийн хөгжимчид “Туркийн ардын хөгжмийн мастерууд Монголд” тоглолтоо “Улаанбаатар театр”-т ирэх бямба, нямд хийхээр зарлажээ. Уран бүтээлчид үндэснийхээ саз хөгжмийн зэмсгээр ардын уран бүтээлүүдээ толилуулах гэнэ.

-Хилийн цэргийн дуу, бүжгийн чуулгын ерөнхий бүжиг дэглээч, дэд хурандаа А.Гансэлэм “Халдашгүй эх орон” тоглолтоо Соёлын төв өргөөнд ирэх бямба гарагт тоглох юм байна.