АНУ-ын Ерөнхийлөгч Жо Байден ОХУ-аас авах эрчим хүчний бүх бүтээгдэхүүнд хориг тавьж буйгаа мэдэгджээ. Мягмар гарагт Украины эргэн тойрон дахь нөхцөл, байдлын талаар Цагаан ордонд үг хэлэхдээ тэрбээр ийнхүү мэдэгдсэн юм.
Тэрбээр "Өнөөдөр би АНУ Оросын эдийн засгийн гол судсыг онилоод байгааг зарлаж байна. Бид Оросын газрын тос, байгалийн хий, эрчим хүчний бүх импортод хориг тавьж байна. Ингэснээр Оросын газрын тос АНУ-ын боомтууд руу нэвтрэх боломжгүй болно.  Бид дэлхий даяар, ялангуяа Европ дахь холбоотнууд болон түншүүдтэйгээ нягт зөвлөлдсөний эцэст ийм шийдвэр гаргалаа. Европ дахь зарим түншүүд одоогоор ийм шийдвэр гаргахад бэлэн бус байгааг бид ойлгож байна. Цаашид эдгээр улс орнуудыг эрчим хүчний эх үүсвэрийн хувьд ОХУ-аас хараат бус болгох чиглэлээр бид хамтран стратеги боловсруулна" гэлээ.
Мөн хувийн хэвшлийн компаниудад хандан Орос, Украины хямралаас үүдэн үнийн хөөрөгдөл үүсгэхгүй байхыг уриалжээ. АНУ тэргүүтэй Европын орнуудад газрын тос, байгалийн хий сүүлийн 11 жилд тохиогоогүй хамгийн дээд үнэд хүрснийг мэдээлж байгаа билээ.
Эх сурвалж: BBC
Э.Номин