Цар тахлын үеийн ажиллах хүчний хомстлыг шийдвэрлэх зорилгоор Өмнөд Солонгосын Засгийн газар гадаад ажилчдын визийн хугацааг сунгах болжээ. Тус улсын Хөдөлмөрийн яамны мэдээлснээр дөрөвдүгээр сарын 13-наас арванхоёрдугаар сарын 31-ний хооронд визийн хугацаа нь дуусаж буй 132 000 гадаад ажилчны оршин суух эрхийг нэг жилээр сунгах аж.

Гэхдээ эдгээр ажилчид визээ анх удаа сунгуулах гэж байгаа тохиолдолд л дээрх журам үйлчлэх гэнэ.

Харин өмнө нь нэг жилээр сунгуулаад хугацаа нь ирэх дөрөвдүгээр сарын 13-наас зургаадугаар сарын 30-нд дуусаж буй бол нэмэлт 50 хоногоор сунгах аж.

Ажил олгогчид гадаад ажилчдынхаа өмнөөс сунгуулах хүсэлтийг Засгийн газрын онлайн системээр гаргаж өгөх юм байна.