Амралтын өдрийн өглөөг амтат сайхан хоолоор эхлүүлэх нь юутай таатай. Энэ удаад өглөөний цай бэлдэхийг эрчүүдэд тусгайлан зөвлөе. Аавуудын гарын хоол ямагт амттай гэдгийг “эх сурвалжууд” хэлдэг.  

Бэлтгэх хугацаа:               15 минут

Хийх хугацаа:                   30 минут

Нийт хугацаа:                   45 минут

Төрөл:                              Өглөөний хоол

Гарах тоо хэмжээ:            4 хүнийх

Найрлага:

• Гахайн нимгэн хэрчсэн утсан мах 8 ширхэг
• Том өндөг 4 ширхэг
• Сүү 1/2 аяга
• Цөцгийн тос 4 хоолны халбага
• Үрсэн чеддар бяслаг нэг аяга (илүү байсан ч болно)
• Тортилла буюу болгож бэлдсэн дугуй хавтгай гурил 4 ширхэг
• Ногоон сонгино амталгаагаар
• Давс, нунтаг хар перец амталгаагаар
• Өөрийн хэрэглэх дуртай соус

Хийх арга:

1. Дунд зэргийн гал дээр хайруулын тавгаа тавьж, цөцгийн тосоо хийн халаагаад гахайн утсан махаа хоёр талаар нь шаржигнасан, шаргал болтол нь 8 минут орчим шарна.
2. Бэлэн болсон махыг тавган дээр гаргахдаа илүүдэл тосыг уусгаж авахын тулд доор нь цаасан сальфетка дэвсээрэй.
3. Дунд зэргийн аяганд өндөг, сүүг хольж, сайтар хутгана. Цэвэр, хуурай болсон хайруулын тавгандаа цөцгийн тосоо хийн, сайн халаасны дараа зуурмагаа шарна. Резинэн хусуур ашиглан зөөлөн эргүүлж, бүрэн болох хүртэл үе үе хутгана. Ингээд давс, перецээр амтална.
4. Эцэст нь Бурритогоо “боож баглана”. Ингэхдээ тортиллагийн гурилаа дэвсэн голд нь хэрчсэн ногоон сонгино, шарсан өндөг, үрсэн бяслагаа тавиад, нэмж хоёр зүсэм гахайн утсан мах, хэрчсэн авокадогоо хийнэ. Ингээд нэг талаас нь нугалж, сайтар өнхрүүлээрэй. Дээр нь соусаа бага зэрэг халааж, асгаад хазвал дэргэдэх хүндээ амсууламгүй “тасархай” болно гэдэгт бүү эргэлзээрэй.

АМЖИЛТ, эрчүүд ээ.