Норвегийн үзэсгэлэнт газруудтай танилц

| Нийтэлсэн Apr 13, 17:05 | Фото мэдээ

Үзсэн : 3943 2

Дэлхий нийтээрээ хэвийн амьдралдаа эргэн орж буй энэ цагт магадгүй та аяллын төлөвлөгөөгөө хараахан гаргаагүй байж мэднэ. Тэгвэл чихэнд чимэгтэй мэдээ дуулгая. Хойд туйлын туяа, үзэсгэлэнт байгаль, өвлийн спорт, цэнхэр хүндэт бүсгүйчүүд, хулд загасаараа алдартай Норвег улсыг аяллын цэг болговол ямар вэ? Дэлхийн хамгийн аз жаргалтай хүмүүс тэнд амьдардаг. Хотууд нь Скандинавын хэв маяг, дэгжин ландшафтаараа гоёдог.

Хэрэв танд Норвегоор аяны "дөрөө мултлах" боломж олдвол дараах үзэсгэлэнт газруудаар заавал тухлан саатаарай.

FLAM RAILWAY

2a

Фламын төмөр замыг дэлхийн хамгийн үзэсгэлэнтэй галт тэрэгний аяллын нэг гэж тодорхойлсон байдаг. Тиймдээ ч Норвегийн аялал жуулчлалын тэргүүлэх газруудын нэг юм. Галт тэрэг Согне-фьордын цутгал Орланд-фьордын төгсгөлөөс Мирдал өртөөний өндөр уулс хүртэл аялдаг. Энэхүү аялал нь танд Баруун Норвегийн үзэсгэлэнт байгалийг хамгийн ойроос үзэх боломж олгоно.

LOFOTEN ISLANDS

3a

Лофотены арлуудаас та байгалийн өвөрмөц үзэгдлийг ойроос харж болно. Норвегийн умард хэсэгт орших эдгээр арлын газарзүйн онцгой байрлал нь хойд туйлын туяаг үзэх дэлхийн хамгийн сайхан цэг юм. Түнэр харанхуйг гэнэт гэрэлтүүлж, хормын төдийд гэгээн цагаан өдрийг дэргэд тань авчирна гээд бод доо.

CAFES IN BERGEN

4a

Хүмүүс энд цуглах дуртай. Норвегийн Берген хотын Бригген дүүрэг гадны жуулчдын их хөлийн газар бөгөөд ирсэн зочид тэндхийн кафед тухалж, алдарт пиво Lervig-ийг шимэн, үндэсний хоолыг нь амтлаад буцдаг. Энэ нь ЮНЕСКО-гийн Дэлхийн өвд бүртгэгдсэн газар юм.

HARDANGERFJORD

5a

Норвегийн зуны өглөө гайхамшигтай. Ялангуяа Хардангер-фьордынх бүр үзэсгэлэн төгөлдөр. Энд жуулчид адал явдлаар дүүрэн дурсамж бүтээх гэж очдог. Эгц цавчим уул хад, мөсөн гол, Ворингсфоссен хүрхрээ, гүн хавцал, алимны үзэсгэлэнт цэцэрлэг, XVII зууны үеийн цайз зэрэг  нь гийчдийн анхаарлыг эрхгүй татдаг. Хэрэв та тийш зорих гэж буй бол дэлхийд хаана ч байхгүй "Нордик" алимны оргилуун дарсыг хүртэхээ мартуузай.

GEIRANGERFJORD

6a

Эгч, дүү долоо хэмээх уг хүрхрээ 410 метрийн өндрөөс чөлөөт "уналт хийдэг". Долоон тусдаа горхиноос бүрддэг учраас ийн нэрлэсэн бөгөөд Норвегийн Море ор Ромсдал мужийн Странда хотын Гейрангер-фьордын дагуу байрладаг. Энэ нь Дэлхийн өвд бүрдгэгдсэн байгалийн цогцолбор газар юм.

ALESUND

7a

Норвегийн Море ор Ромсдал мужид байдаг Хотын захиргаа нь ийм үзэсгэлэнтэй шүү. Санморе дүүргийн төв болох Алесунд нь тус бүс нутгийн далайн тээврийн гол хот юм. Энэ боомт хот "Art Nouveau" архитектурын хэв маягаараа алдартай. 

OSLO

8a

Норвегийн нийслэл Осло хот нь орчин үеийн өнгө загвартай, сэтгэл татам барилга байгууламжаас эхлээд соёлын олон зүйлийн өвийг хадгалсан хуучны донж, маяг бүхий цайз, сүм хэрмүүдээс бүрдэнэ. Хэдийгээр дэлхийн томоохон хотуудтай харьцуулахад хүн ам цөөн ч жуулчдыг уйдаахааргүй үзэсгэлэнт газрууд олонтой. Үндэсний галерей, Хааны ордон, Осло сүм, Триванн цанын бааз, Норвегийн Дуурь бүжгийн эрдмийн театр, Акершусын цайз, Вигеланд баримлын цэцэрлэгт хүрээлэн зэрэг 19 онцлох газрын нэрийг тус Хотын захиргаа жуулчдад зориулсан 2022 оны гарын авлагадаа оруулжээ. 

PULPIT ROCK and Lysefjorden

10a

Уулын хавцал дундуурх усан завины аяллыг амьдралдаа нэг удаа туршихыг боддоггүй хүн үгүй л болов уу. Хэрэв та тэдний нэг бол энэ яг тохирох газар гэдгийг хэлэхэд таатай байна. Ставангер хотын төвөөс Прейкестолен хүртэл 3.5 цаг орчим үргэлжлэх цахилгаан завины Лисе-фьордын аяллаас хүүхэд, хөгшин залуугүй 100 хувь сэтгэл ханамжийг мэдэрнэ. Түүнчлэн Пулпит хадан цохион дээр гарч, эргэн тойрны үзэсгэлэнт тогтоцуудыг алган дээр буй мэт бүхэлд нь харах бас нэгэн таашаал бус уу.

Том Круз "Биелэгдэшгүй даалгавар 6" киноны зургийг энэ газарт авчээ.

NARVIK

12a

Нарвик нь Офо-фьордены эрэгт байрладаг,  Норвегийн гурав дахь том хот юм. Хойд туйлын тойрог дотор орших энэ нутагт цанаар гулгах, уулын дугуй унах, бүргэдтэй сафарид оролцох, нохой чаргаар аялах боломжтой юм. Хэрэв та тавдугаар сард Нарвикийг зоривол Фелькистен эрэг дагуух шар шувууны сафарид оролцохоос бүү татгалзаарай.

TRONDHEIM

14a

Өнгийн цэцэгс мэт үзэмж сайтай энэ хот Норвегийн зүүн хэсэгт байрладаг. Тус суурин 997 онд худалдааны төв болон анх байгуулагдсан бөгөөд 1217 он хүртэл Норвегийн нийслэл нь байжээ. Түүх, соёлын дурсгалт эл хотод шинжлэх ухаан, технологийн томоохон төвүүд, хамгийн сүүлийн үеийн технологийн старт-ап бойжуулах инкубаторууд болон коворкинг газруудын өлгий юм. Энд тус улсын хамгийн том эрдмийн төв болох Норвегийн Шинжлэх ухаан технологийн их сургууль байрладаг.

 

Эх сурвалж: countryliving.com, wikipedia.com, visitnorway-com

Сэтгэгдэл

Анхааруулга: Уншигчдын бичсэн сэтгэгдэлд Qnews.mn хариуцлага хүлээхгүй болно. Манай сайт ХХЗХ-ны холбогдох журмын дагуу зүй зохисгүй зарим үг хэллэгийг хязгаарласан тул Та сэтгэгдэл бичихдээ бусдад хүндэтгэлтэй хандана уу!

Love
Cry
Anger
laughing
thinking
confused
Халуун сэдэв

Их үзсэн

Та цаг алдалгүй шинэ мэдээлэл авах бол