Монгол, Италийн Засгийн газрын хамтын ажиллагааны хүрээнд “Итали, Монголын текстил (нэхмэл)-ийн технологийн төв”-ийг өчигдөр нээжээ. Тус төвийг Итали улсын Засгийн газрын буцалтгүй тусламжаар Монголын ноос, ноолуурын холбооны дэргэд байгуулав. Хоёр улсын бизнес эрхлэгчдийн хамтын ажиллагааг өргөжүүлж, малынхаа ноос, ноолуурыг Италийн дэвшилтэт технологиор боловсруулан, нэмүү өртөг шингэсэн бүтээгдэхүүн үйлдвэрлэхэд тус технологийн төв чухал нөлөө үзүүлэх аж.

Цаашид тус төвөөр дамжуулан Италийн шинэ техник, технологийг нэвтрүүлж, шилдэг инженерүүдийг бэлтгэн, чадавхжуулах юм. Мөн үйлдвэрлэгч болон худалдаа эрхлэгчдэд зориулж бүтээгдэхүүний дээж үйлдвэрлэх, шинэ төслүүдтэй хамтран ажиллах, туршилт судалгаа зэргийг хийхээр төлөвлөжээ.