"Дархлаажуулалтын хөтөлбөрийн хэрэгжилт" үндэсний зөвлөлдөх уулзалтаар нийгмийн эрүүл мэндийн талаарх төрөөс баримтлах бодлого, чиглэл, Халдварт өвчинтэй тэмцэх, сэргийлэх үндэсний хөтөлбөр (2017-2021)-ийн хэрэгжилт, дэлхийн дархлаажуулалтын хөтөлбөрийн бодлого, чиглэл зэрэг 11 илтгэл хэлэлцүүлснийг ЭМЯ-ныхан мэдээллээ.

Манай улс төдийгүй дэлхийн хэмжээнд цар тахлын нөлөөгөөр товлолоор хийдэг вакцины хамрах хүрээ хумигдсаныг дээрх хурлаар онцолсон байна. Мөн Засгийн газар, ЭМЯ, хандивлагч улс орнууд, олон улсын байгууллагынхны тусламжтайгаар Монгол Улс өнгөрсөн хугацаанд коронавирусийн 8.3 сая хүн/тун вакцин оруулж иржээ. Үүнээс хүн амыг 5.5 сая тунгаар нь вакцинжуулсан байна. Тэгвэл дархлаа сэргээх нэмэлт тунгийн хамрагдалт улсын хэмжээнд өдгөө 53 хувьтай байгааг албаныхан хэлсэн.