Монгол Улсын цахим хөгжлийн багц хуулиуд батлагдан,  тавдугаар сараас мөрдөж эхлээд буй. Тодруулбал,  Нийтийн мэдээллийн ил тод байдлын тухай хуульд заасны дагуу төрд хадгалагдаж буй иргэн болон аж ахуй нэгжийн аливаа мэдээллийг ямар нэгэн байдлаар ашиглах бол  эзэнд нь заавал мэдэгдэх ёстой аж. Энэ хүрээнд тухайн хүний мэдээллийг төр бусдад дамжуулсан бол иргэддээ мэдээлэх системийг туршилтын байдлаар ажиллуулж эхэлжээ. Ингэхдээ и-Монголиа аппликейшнд мэдэгдэл цэс шинээр нэмcэн байна. Мөн цаашид иргэн бүр дахин давтагдахгүй 12 оронтой тоо бүхий бүртгэлийн дугаартай болох бөгөөд үүгээр үүсгэсэн цахим шуудангийн хаягаараа дээрх мэдэгдлийг давхар авах боломжтой болох гэнэ. Түүнчлэн өөрийн нэр дээрх гар утасны дугаараа эл системд бүртгүүлснээр мэссэж хэлбэрээр ч хүлээн авах нөхцөл бүрдэх аж.