“Боловсрол” телевизийн “Яг түүн шиг-2022” шоу ирэх сараас долоо хоног бүрийн ням гарагт үзэгчдийн хүртээл болох нь. Сонирхолтой үзүүлбэр, содон өнгө төрхөөрөө үзэгчдийг байлдан дагуулж, оролцогчдын авьяас, ур чадварыг багагүй сорьдог тус нэвтрүүлгийн энэ улиралд найман уран бүтээлч оролцох юм байна. Гавьяат жүжигчин, дуучин С.Наран, ДБЭТ-ын гоцлол дуучин, Гавьяат жүжигчин Ө.Уянга, “Дижитал” хамтлагийн дуучин Г.Эрдэнэбилэг, дуучин С.Зоригт, Б.Чойжилсүрэн, Ч.Мишээл, С.Баянмөнх, жүжигчин Х.Баярмаа нар оролцох аж. Шоуг жүжигчин Э.Цолмонбаяр, Б.Болд нар уламжлал ёсоор хөтөлнө.

Тус шоу нэвтрүүлгийг анх 2016 онд үзэгчдийн хүртээл болгож, дуучин П.Баярцэнгэл түрүүлсэн билээ. Улмаар II улирлын ялагчаар жүжигчин Т.Бархүү, дараагийн улиралд нь дуучин Б.Нацагдорж тэргүүлсэн юм. Мөн 2019 онд шоуны шилдэг оролцогчид дахин өрсөлдөж, жүжигчин Т.Бархүү ялагч болж байв.