“Ю фильм” болон “Номадиа пикчерс”-ийн хамтын бүтээл “Яаралтай тусламжийн тасгийнхан” олон ангит уран сайхны киног “HD Монгол” телевизээр гаргаж буй. Тэгвэл тус киноны яаралтай тусламжийн эмчилгээ, үйлчилгээ, мэс заслын талаарх зураг авалтуудын зарим нь хэт хийсвэр, бодит байдалтай нийцэхгүй, эмч, мэргэжилтнүүдийн ур чадварыг үгүйсгэсэн хэмээн эрүүл мэндийн салбарынхан шүүмжилж эхэллээ.

Тодруулбал, ЭМЯ-ны Нүүр, ам судлалын мэргэжлийн салбар зөвлөлөөс дараах мэдэгдлийг гаргаад байна. Тэд “Яаралтай тусламжийн тасгийнхан” олон ангит уран сайхны кино нь нүүр, ам судлалын салбарынхны өнөөг хүртэл хөгжүүлж ирсэн ололт, амжилтыг үгүйсгэсэн, олон нийтэд буруу ташаа мэдээлэл өгөхүйц агуулга олон байгаад мянга мянган эмч, мэргэжилтэн эмзэглэж байгааг үүгээр мэдэгдье. Монголын нүүр, ам судлалын салбарын хөгжил Азийн болон дэлхийн хөгжингүй орнуудтай эн зэрэгцэхүйц ижил түвшинд хүрснийг кино багийнхан тунгааж, цаашдын уран бүтээлдээ бодит байдлыг үнэн зөвөөр харуулж, хүндэтгэлтэй хандахыг хүсье” гэлээ.