Хөдөлмөрийн тухай хуулийн зарим заалтыг шинэчлэн найруулж, энэ оны нэгдүгээр сараас эхлэн мөрдөж байгаа билээ. Тус хуулийн зургадугаар бүлэгт ээлжийн амралтыг дараах байдлаар зохицуулахаар заажээ.

-Ажилтан хөдөлмөрийн гэрээ байгуулснаас хойш зургаан сар ажилласан бол ээлжийн амралт авах эрх үүснэ.

-Амралтаа тухайн жилдээ багтаан хэсэгчлэн эдлэх боломжтой. Ингэхдээ нэг удаагийн амралт ажлын 10 өдрөөс доошгүй байна.

-Ажлын зайлшгүй шаардлагаар ээлжийн амралтаа биеэр эдэлж чадаагүй ажилтанд цалинг нь 1.5 дахин нэмж олгоно.

-Ээлжийн амралтын үндсэн хугацаа ажлын 15 өдөр байна. Хөгжлийн бэрхшээлтэй болон насанд хүрээгүй бол ажлын 20 өдөр амрах эрхтэй. Хэвийн нөхцөлд хөдөлмөр эрхэлж буй хүний ажилласан хугацааг харгалзан  үндсэн амралтын өдрийг дараах байдлаар сунгана.

-6-10 жил ажилласан бол гурван өдөр 11-15 бол тав, 16-20 бол долоо, 21-25 бол ес, 26-31 бол 11, 32 дахь жилээс 14 өдөр нэмж амарна.

Харин хөдөлмөрийн хэвийн бус нөхцөлд ажиллаж байгаа бол 6-10 жилд тав, 11-15-д долоо, 16-20 жилд ес, 21-25 бол 12, 26-31-д 15, 32-оос дээш жил бол 18 өдөр сунгаж амарна.

-Бүтэн бус цагаар ажилладаг бол тухайн жилд нийт ажилласан хугацааг тооцож, ногдох үндсэн болон нэмэлт амралт олгоно.

-Хөдөлмөрийн гэрээ нь дуусаж буй ажилтанд ажилласан хугацаанд ногдох ээлжийн амралтын тооцоо хийж, цалинг олгоно.