Цар тахлын үед их хэмжээний түрээсийн төлбөрт унаж, үйл ажиллагаагаа бүрэн зогсоосон “Дүдү” хүүхдийн шинжлэх ухааны музейг ирэх дөрөвдүгээр сарын 1-нээс нээх болсон. Хоёр салбартайгаар хүүхэд, багачуудад үйлчилдэг байсан тус музейнхэн өнгөрсөн хугацаанд үүдээ хааснаар 200 орчим сая төгрөгийн түрээсийн өртэй хоцорч, “И-март” дахь салбараа бүрмөсөн хаасан аж. Харин Зайсан дахь салбараа олон нийтийн дэмжлэгээр ийнхүү нээж байна.

“Дүдү-“гийнхэн хүүхдийн шинжлэх ухааны музейгээ аврах аян өрнүүлж, 10 000 ширхэг тасалбарыг нээлтийн үйл ажиллагаанаас урьдчилан борлуулж, засвар, үйлчилгээгээ хийн, өр төлбөрөө барагдуулж буй.

Одоогоор 10 000 ширхэг тасалбарын 70 гаруй хувийг эцэг, эхчүүд, албан

байгууллагынхан худалдан авч, музейг аврах аянд нэгдсээр байгааг зохион байгуулагчид хэллээ. Нээлтийн тасалбар авсан хүүхэд, багачууд хүссэн өдрөө үйлчлүүлэх эрхтэй.

Тасалбарын үнэ 20 000 төгрөг бөгөөд та бүхэн ч бас хүүхдийн шинжлэх ухааны музейг аврах аянд нэгдэж, өөрт ойр байрлах “CU Mongolia” болон “GS25”-ын бүх салбараас билет авах боломжтой. Мөн “FinBerry”, “MonPay”, shoppy.mn, “HiPay” duduzone.zochil.mn платформоос мөрөөдлийн тасалбараа захиалаарай.