Монголын урчуудын эвлэлийн нэрэмжит шагналт, зураач Д.Соёлмаа “Let it be” бие даасан үзэсгэлэнгээ дэлгэжээ. Урчуудын эвлэлийн хорооны үзэсгэлэнгийн танхимд дэлгэсэн түүний бүтээлүүдэд тал нутгийн эрх чөлөөт дагинасыг өвөрмөц, шинэлэг зохиомжоор дүрсэлсэн байна. Түүний бүтээлд дагинасын дүр томоохон байр суурь эзэлдэг аж. Өнгөлөг дагинасыг өөр өөр өнцгөөс харуулах тус үзэсгэлэн ирэх сарын 2 хүртэл нээлттэй.

“Тайвшрал”

Хэн нэгэн сэтгэлээр унаж, шантрах үед бурхан амар амгалан газар луу даллаж буй мэтээр төсөөлөн тус бүтээлийг туурвижээ.

"Хоосон сансрын дохио"

Зураач эл бүтээлд амьдрал болон далд ухамсрыг харуулжээ. Сансар огторгуйн нууц, Буддын гүн ухаан, өнгөрсөн, одоо, ирээдүйн тухай ч тусгасан гэнэ.

"Beautiful mind”

Тус бүтээлд хүний дотоод ертөнцийг өгүүлсэн аж. Хүн бүрийн дотор бурхан оршиж буй гэсэн санааг зураач өөрийнхөөрөө ийнхүү дүрсэлжээ.