Хүн төрөлхтний түүхэн дэх бүх нээлтээс олон сая хүний амь аварсан ололт нь вакцин билээ. Дархлаажуулалтын дэлхийн долоо хоногийн хүрээнд НҮБ-ын Хүүхдийн сангийнхан өнгөрсөн хугацаанд вакцин гарган авахад оролцсон, түгээсэн, дархлаажуулсан бүх хүнд талархлын захидал илгээв.

Сүүлийн 75 жилийн турш НҮБ-ын Хүүхдийн сан вакцины дэлхийн хамгийн том худалдан авагч байж, бөмбөрцгийн бүх хүүхдийн 45 хувийг дархлаажуулсан байна. Тэдний нэг харилцагч, хэрэглэгч нь Монгол Улс билээ. Тэдний талархлын захиаг хүргэе.

• Халдварт саагийн эсрэг вакцин гаргасан вирус судлаач Жонас Сок танд баярлалаа.
• “Ковид-19”-ийг ялан дийлэхэд томоохон хувь нэмэр оруулсан, mRNA-ийн судалгаанд амьдралаа зориулсан Кэйти Карико танд баярлалаа.
• Шар чичрэг өвчний эсрэг вакцин гарган авахын тулд өөрийн цусаа шумуулд соруулсан, судлаачдын багийн ахлагч, Нобелийн шагналт Макс Тэйлэр танд баярлалаа.
• Үйлдвэрүүдэд вакцин савладаг ажилтнуудад баярлалаа.
• Нарны илчээр ажилладаг хөргөгч бүтээсэн зохион бүтээгчдэд баярлалаа.
• Дөнгөж төрсөн нярайд вакцины анхны тунг нь хүргэхээр үерлэсэн гол, мөрнийг туулж, цас мөсийг гаталж, уул хад, тал цөлийг даван явдаг нисгэгчид, автомашин, усан онгоцны жолооч нарт баярлалаа.
• Улаан бурхан, улаанууд өвчнөөс 90 сая хүүхэд хамгаалах “их гараанд” цаг нартай өрсөн явдаг вакцин тээвэрлэгч Пакистаны тэмээ, жинчдэд баярлалаа.
• Хүүхэд зугаацуулан аргадагч эмч, сувилагч нарт баярлалаа.
• 1956 онд тайзан дээр халдварт саагийн эсрэг вакциныг анх хийлгэсэн Элвис Преслид баярлалаа.

Бидний энэ захидал бол хайрынх юм. Учир нь вакцин нээхэд, бүтээхэд, үйлдвэрлэхэд, хүүхдэд амжиж хүргэхэд хайр л хэрэгтэй. Хайр байгаа учраас л зөрчил, мөргөлдөөнтэй бүсэд ч НҮБ-ын Хүүхдийн сангийнхан вакцин хүргэдэг. Хайр байсан учраас л 20-хон хувьтай байсан хүүхдийн дархлаажуулалтыг өдгөө 80 хувьд хүргэсэн. Хайр байгаа учраас л  ДЭМБ 1966 онд Дархлаажуулалтын үндсэн хөтөлбөрийг гаргаж, 11 жилийн дараа цагаан цэцэг өвчнийг дэлхийгээс арчсан.

Эцэст нь, баярлалаа гэж хэлэх нэг л хүн үлдлээ. Энэ бол та өөрөө юм. Үүнийг танд ч бас хаяглалаа. Учир нь та хэзээ нэгэн цагт вакцин хийлгэсэн, өөрийнхөө хүүхдүүдийг вакцинд хамруулсан бол эрүүл энхийн манаанд зогсож буй олон сая хүний нэг юм, баярлалаа...гэжээ.