“Хичээл зүтгэл эзнээ хэзээ ч гомдоодоггүй” хэмээн хэвлүүхэн ярих энэ охиныг Гантөмөрийн Нямтунгалаг гэдэг. Тэрбээр нийслэлийн 87 дугаар сургуулийн 12Б ангид суралцдаг. Тус сургууль нь хотын төвөөс алслагдсан, Баянзүрх дүүргийн 23 дугаар хороо, Улайстайн эцэст байрладаг юм. Цагдаагийн хэлтэс, эмнэлэг, эмийн сан, хүнсний дэлгүүр, цайны газар, худаг, шатахуун түгээгүүрээс өөрөөр хүүхэд, өсвөр үеийнхэнд зориулсан үйлчилгээ, дугуйлан, спорт клубгүй энэ буйд хороонд Г.Нямтунгалаг өөрийгөө хэрхэн хөгжүүлж, манлайлагч сурагч болсон юм бол.

Г.Нямтунгалаг нь дөрвөн хүүхэдтэй айлын ууган охин бол сургуульдаа тэрбээр “Манлайлагч сурагч академи”-ийн тэргүүн, “Улаан загалмай нийгэмлэг”-ийн хариуцлагатай нарийн бичгийн даргын “алба” хашдаг. Түүгээр үл барам 12 дахь жилдээ “А” буюу онц үнэлгээтэй суралцаж буй юм байна. Сургуулийнхаа эдгээр клуб, нийгэмлэгээрээ дамжуулж тэрбээр үеийн найзууд, дүү нартаа төрөл бүрийн сургалт, хурал, зөвлөгөөн зохион байгуулж, төсөл хүртэл хэрэгжүүлэн тэдний хөгжлийг дэмждэг гэж байгаа. Мөн сурагчдын дунд ямар үйл ажиллагаа зохион байгуулбал үр дүнтэй талаар үеийнхэнтэйгээ ярьж, зөвлөлдөн түүнийгээ сургуулийнхаа удирдлагад уламжлан, дуу хоолой нь болсоор яваа аж.

Түүний зарим олон нийтийн ажлаас нь танилцуулъя. “Канадын сан” болон “Лантуун дохио” төрийн бус байгууллагаас хамтран хэрэгжүүлдэг “Мэдлэг бол миний бие хамгаалагч” сургалтад Г.Нямтунгалаг хамрагдан, бүр сургагч багш нь болжээ. Тус сургалтаар хүүхэд, өсвөр үеийнхэнд хүний наймаа, цахим орчны зөв хэрэглээний талаар болон ийм гэмт хэргээс хэрхэн урьдчилан сэргийлж, өөрсдийгөө хамгаалах талаар заадаг юм байна. Г.Нямтунгалаг эл сургалтаа нийслэлийн өөр дүүрэг, хороодын олон сургуулийн сурагчдад түгээжээ. Сургалтынхаа гол агуулгыг 40 минутад хэрхэн багтаан ярьж, ойлгуулах аргыг ч өөрөө бодож олсон гэнэ.

Түүнчлэн Швейцарын хөгжлийн агентлагийн “Иргэдийн оролцоо” төсөл, “Монголын Карл Попперын мэтгэлцээний нийгэмлэг”-ийнхний хамтран хэрэгжүүлдэг “Improve programm” хөтөлбөрт Г.Нямтунгалаг хамрагдаж, үүний дагуу төсөл хэрэгжүүлжээ. 6-11 насны хүүхдүүдийн цөөнгүй хувь нь өсөлт, хөгжлийн хоцрогдолтой, зарим нь тураалтай бол нөгөө хэсэг нь илүүдэл жинтэй байдаг талаарх судалгаанд үндэслэн тэрбээр “Авокадо-D” нэртэй төслөө хэрэгжүүлсэн аж. Үүний хүрээнд хүүхдүүдэд эрүүл хооллолт, шим тэжээлтэй хоол, хүнсний талаарх мэдлэг олгож, зөвлөгөө хүргэсэн байна. Хөл хорионы үеэр уг арга хэмжээгээ цахимаар зохион байгуулж, мэдлэг бататгах тэмцээнүүдийг хүртэл зохион байгуулжээ.

Энэ мэт Г.Нямтунгалагийн хийсэн ажил, хэрэгжүүлсэн төсөл дуусахгүй. Нийслэлийн ЗДТГ-аас зохион байгуулдаг “Шар дарцаг” аяны хүрээнд тэрбээр сургуулийнхаа нийгмийн ажилтан Б.Дүүрэнбаяртай хамтран нөлөөллийн ажлууд хийсэн нь “нүдээ олжээ”. Хүүхдийг зам, тээврийн осолд өртөхөөс урьдчилан сэргийлэх хүрээнд тэд “Шар дарцаг”-ийг анги бүрээс цуглуулж, сургууль орчмын таван цэгт хайрцгаа байршуулж, эцэг, эхчүүд болон хүүхдүүдэд мэдээлэл хүргэн, түүнийг хэрхэн ашиглах заавраа ч танилцуулсан байна.

Сургуулийнхаа шилдэг сурагч, мөн клуб, академийнхаа удирдах ажлыг “торохгүй” амжуулчихдаг Г.Нямтунгалаг гэртээ бол сайн эгчийн үүрэг гүйцэтгэнэ. Дүү нарынхаа хичээлийг давтуулна, гэр орноо цэвэрлэнэ, хоолоо хийнэ гэхчлэн түүнд бусад охидын адил ажил мундахгүй. Хамгийн бага буюу дөрвөн настай дүү нь түүний ачаар өдгөө 35 үсгээ нүдэлсэн, англи, монголоор үг, тоонуудаа сурч буй гэхээр Г.Нямтунгалаг хэр сайн эгч вэ гэдэг нь үүнээс харагдах биз ээ.

Тэрбээр “Манай хороо хотын төвөөс алслагдсан, хүүхэд, өсвөр үеийнхэнд чиглэсэн соёл, үйлчилгээний байгууллага байхгүй ч сургуулийн удирдлага, багш нар маань биднийг хөгжүүлэх бүх л арга, нөөц бололцоог бүрдүүлэн ажилладагт нь талархдаг. Би ч гэсэн чадлынхаа хэрээр түүнд нь оролцож, бусдадаа тусалж, үлгэрлэхийг хичээдэг. Өмнө нь би хятад хэлний сургалтад явдаг байлаа. Хичээлээ тараад хотын төв рүү очиж, ирэхэд маш их хугацаа зарцуулдаг байсан учраас түүнийгээ орхисон. Харин азаар, манай хорооны хажууд “Ид шидийн орон-2” нээгдсэнээр сурагчид, хүүхдүүд бидэнд маш том боломж нээгдсэн. Тус төвөөс англи, солонгос хэлний сургалт явуулдаг. Оёдлын сургалт хүртэл бий гээд бод доо, гоё байгаа биз. Хүүхдүүдийн төлөө бүх л сэтгэл, зүрхээ зориулан ажилладаг “Ид шидийн орон”-ы ах, эгч нартаа маш их баярлалаа. Чөлөөт цагаараа дүү нараа дагуулаад тийш очиж, хичээлээ хийнэ, ном уншина. Найзуудтайгаа мөн очиж, хичээлээ давтдаг. Манайх хашаа, байшинд амьдардаг л даа. Намайг ийм нээлттэй, тууштай байх зан чанар, хүмүүжлийг ээж, аав минь надад олгосон. Тэд минь бид дөрвийн төлөө, сурч боловсрох, аюулгүй орчинд амьдруулахын тулд бүхнээ зориулдагт үнэхээр их баярладаг” гэж ярилаа.

 МУИС-ийг “онилон”, хуульч болохоор хичээлдээ шамдан суралцаж буй Г.Нямтунгалаг цар тахлын үед ч хариуцлагатай байж, халдвар, хамгааллын дэглэмээ сайн сахьсан тухайгаа хэлнэ лээ. Өсвөр насныхан эрүүл мэндийн наад захын мэдлэг, ойлголттой байхын давуу талыг тэрбээр “Хүүхэд бүр багаасаа амьдралын зөв дадал, хэвшилтэй байх нь ирээдүйд эрүүл иргэн болж төлөвшин, улс, эх орондоо ихийг хийж, бүтээж чадна гэж боддог. Эрүүл мэндийн мэдлэгтэй байна гэдэг нь энгийн зүйлээс эхэлдэг болов уу. Өглөө хичээлдээ өлөн ходоодтой явахгүй байх, хэт өлссөн үедээ их идэхгүй байх, шарсан, хуурсан, лаазалсан хоол, хүнснээс аль болох татгалзах, дасгал, хөдөлгөөн тогтмол хийх гэх мэт энгийн дадал, хэвшлийг амьдралынхаа хэв маяг болгочиход л олон өвчнөөс сэргийлэх боломжтой юм билээ. Миний үеийнхний зарим нь утсаа үзэж, олон цагаар тоглох зэрэг дутагдалтай тал ажиглагддаг. Энэ нь эргээд дархлаа сулруулах, хөдөлгөөний дутагдалд оруулах, таргалалтад өртүүлэх аюултай тул амьдралынхаа хэв маягийг жаахан ч атугай өөрчлөөсэй гэж зөвлөе. Ташрамд, 2021-2022 оны хичээлийн жилд 12 дугаар ангиа төгсөх бүх хүүхдэд амжилт хүсээд, сонгосон сургуульдаа заавал тэнцээсэй гэж залбиръя” хэмээлээ.