Өмнөд Солонгосын Ерөнхийлөгчийн сонгууль гуравдугаар сарын 10-нд болж, сөрөг хүчний намын Юн Сук Ёл ялалт байгуулжээ. Энэ удаагийн сонгууль нь Өмнөд Солонгосын түүхэн дэх хамгийн өрсөлдөөнтэй нь болсон гэж хэвлэлүүд нь тэмдэглэжээ. Консерватив намын Юн Сук Ёл эрх баригч намаас нэр дэвшигч Ли Жэ Мюнаас ердөө 0.73 хувийн зөрүүтэйгээр ялалт байгуулсан байна.

Тус улсын Үндэсний сонгуулийн хорооны мэдээлснээр, Юн Сук Ёл 48.56, Ли Жэ Мюн 47.83 хувийн санал тус тус авчээ. Өчигдөр сонгуулийн үеэр Сөүл хотын төв талбайд хүмүүс цуглаж, Юн Сук Ёлыг феминизмын эсрэг үзэл гаргасан хэмээн тайван суулт хийсэн юм. Гэсэн ч түүнийг дэмжигчдийн тоо ийнхүү илүү байснаар ялалт байгуулжээ. Тэрбээр Хүйсийн эрх тэгш байдал, гэр бүлийн яамыг татан буулгаж, оронд нь хүүхэд, гэр бүл, хүн ам зүйн асуудалд чиглэсэн шинэ яам байгуулна гэсэн нь их маргаан дагуулсан аж.

Шинэ ерөнхийлөгч Юн Сук Ёл цаашдын гадаад бодлого, тэр дундаа Хойд Солонгостой харилцах харилцаандаа хатуу байр суурьтай байхаа мэдэгдсэн юм. Тэр дундаа батлан хамгаалахын хүчин чадлаа нэмэгдүүлэх зорилгоор пуужингийн довтолгооноос хамгаалах систем бий болгоно гэж амласан. Мөн түүнийг нийгмийн халамж, үл хөдлөх хөрөнгийн бодлого зэрэгт ихээхэн өөрчлөлт авчирна гэж иргэд нь хүлээлтэй байгаа аж.

Түүнчлэн БНСУ-ын гол асуудлын нэг болоод буй үл хөдлөх хөрөнгийн үнийн хэт хөөрөгдлийг зогсоож, 2.5 сая орон сууц нийлүүлэх нөхцөл бүрдүүлэн, татварыг бууруулна хэмээн амлажээ.

Тус сонгуульд нийт сонгогчдын 4/3-аас олон хүн оролцсон нь хамгийн идэвхтэй үзүүлэлт болсон байна.

Эх сурвалж: BBC

Э.Номин