Аутизм, тархины саажилт, даунтай хүүхдүүдэд тусгайлан зориулсан цэцэрлэг, сэргээн засах төвийн хүртээмж Монголд нэлээд тааруу. Хүмүүсийн хамгийн сайн мэддэг нь сувиллын 10 болон 186 дугаар цэцэрлэг л гэж бий. Тэгвэл аутизм, тархины саажилт, даунтай хүүхдүүдийг хүлээн авах “Open heart” цогц хөтөлбөр, орчин бүхий цэцэрлэгийг ирэх тавдугаар сард нээх аж. Тус цэцэрлэгийг хөгжлийн бэрхшээлтэй хүүхдүүдийн тусгай 186 дугаар цэцэрлэгчийн эрхлэгч асан Г.Буянжаргалын санаачилгаар барьжээ.

Хан-Уул дүүргийн 19 дүгээр үйлчилгээний төвд байрлалтай тус цэцэрлэг тавдугаар сарын 1-нээс хүүхдүүдээ бүртгэж эхлэх аж. Дээрх төрлийн хөгжлийн хоцрогдолтой хүүхдүүд нь тусгайлсан анхаарал шаарддаг тул эхний ээлжид 40 хүүхэд л хүлээн авах бололцоотой гэнэ.

Аутизмтай хүүхэдтэй эцэг, эхчүүдэд тулгардаг нэг асуудал нь хэл заслын мэргэжлийн төв, тэр дундаа мэргэжлийн багш дутагдалтайн улмаас хүүхдээ хамруулж чаддаггүй. Тэгвэл “Open heart” цэцэрлэгт мэргэжлийн багш нар хэл, хөдөлгөөн, ахуй заслын хичээл орох бөгөөд богино хугацааны сургалт ч явуулж болохоор давуу талтай аж.