Гэр бүлийн үнэнч анд бол тэжээвэр амьтад юм. Анх 30 000 жилийн өмнө хүн, нохой хоёр нөхөрлөсөн цагаас хүмүүс амьтан гаршуулж, гэртээ тэжээх болсон гэдэг. Манайхан ч нэг үеэ бодвол амьтан хайрлан тэжээж, хамгаалдаг болоод буй. Гэхдээ тэжээвэр амьтдад тавих анхаарал, халамж, асаргаа хүүхдээс дутахгүй. Бас тэдний талаар мэдэхгүй зүйл ч туйлын их. Тиймээс гэртээ амьтан тэжээхээр төлөвлөж буй хүмүүст дараах зөвлөгөөг хүргэе.

1. Эхлээд гэр бүлийн гишүүдтэйгээ энэ нь үнэхээр чухал, эсэх талаар сайн ярилцаарай. Дараа нь яг ямар амьтан тэжээх вэ гэдгийг сонгохын тулд сайтар судлах хэрэгтэй. Шинэ "зочин" тань гэр бүлийн гишүүн болж буй учраас түр зуурын хэрэгцээ хэмээн өнгөц хандаж болохгүй. Тиймээс яг хэрэгтэй юү гэдгээ дахин нэг бодож үзээрэй.
2. Гэр бүлийн санхүүд хэр хэмжээний ачаалал нэмэгдэхийг бас тооцож үзэхэд гэмгүй. Учир нь нохой, муураар жишээлж үзвэл вакцин, хоол, витамин зэрэг нь чамгүй зардал гардгийг дурдъя. Загас тэжээх бол аквариум, амьд ургамал, агааржуулалтын систем, гэрэл, шүүлтүүр зэргийг худалдан авах шаардлагатай болно.
3. Амьтан ч бас бидний адил эдлэх эрхтэй. Тэдэнд амьдрах тухтай байр, цэвэр орчин хэрэгтэй. Жишээ нь, гөлөг авбал тэд их цагийг тоглож, бас унтаж өнгөрүүлдэг учир тухтай ор, зөөлөн тоглоом олныг бэлдсэн байх аж.
4. Нэгэнт сонголт хийсэн бол цаг гаргаж, хамтдаа тоглон, шинэ зүйлс заахдаа санаа тавиарай. Тэдэнд яг л хүүхэд шигээ хандан, өдөр бүр нэг зүйлийг зааж, сургавал насан туршийнх нь дадал зуршил болдог шүү.
5. Амьтны хоол чухал. Өдөр, оройн хоолонд юу зохистойг судалж, тогтмол цагт өгч байх нь зүйтэй. Өөрсдийнхөө хоолноос илүүчилж огт болохгүй шүү. Энэ нь хор юм. Шинэ дасгал сурах болон зөв зүйлс хийх үед нь зөвхөн хоол биш, тусдаа амттанаар шагнаж, урамшуулж байвал тэд гайхалтай суралцагчид болдог. Харин өгөх амттаныхаа орц, найрлагыг сайтар анхаараарай.
6. Хүүхэд, багачуул болон ижил төрлийн найзтай нь байнга уулзуулбал тэд “нийгэмшиж”, сэтгэл санаа нь өөдрөг болно.
7. Нохой, муур зэрэг амьтанд микрочип суулгавал алдах эрсдэлгүй.
8. Хүнтэй харилцаж байгаа мэт үргэлж ярих хэрэгтэй. Тэд таны сэтгэл зүйн байдал, хэлж ярьж буй бүхнийг ойлгож, цээжилж авдаг нь үнэхээр гайхалтай.
9. Хариуцлагатай байх нь амьтан тэжээгчийн хамгийн чухал чанар юм. Бүх зүйлсийг хамтдаа хийх, гэр бүлийн тоглоомдоо ч оролцуулах нь тэднийг олны дунд “биеэ зөв авч явах" чадварт сургадаг. Өдөр бүр тогтмол цагт салхинд гаргахаа мартуузай.
10. Хамтдаа амар. Тэдний ч бас бие, сэтгэл өдрийн ачаалалдаа маш их ядардаг. Таныг ажлаас ирэхийг хүлээж, сэтгэл нь зовниход л тэр “стресстэх” болно. Тиймээс хамт байхыг эрхэмлэж, тэвэрч, эрхлүүлж, унтахад нь хүртэл санаа тавихыг хичээгээрэй.