Монголын уран зургийн галерейнхэн Ардын зураач Д.Амгалангийн 1965 онд туурвисан “Жаахан шаргын нутагт” зургийг сэргээн засварласнаа олны хүртээл болгож буй. Социалист бүтээн байгуулалт болон соёлын хувьсгалыг монгол ахуйтай хослуулан бүтээсэн тус зураг хэд хэдэн газраа цоорон, будаг нь халцарч, олон жилийн тоос тортогт дарагдсан байжээ.

Тус галерейн “Урлагийн бүтээл үрчлүүлэх” хөтөлбөрийн хүрээнд нэгэн үзэгч эл зургийг сэргээн засварлах зардлыг хандивласан гэнэ. Бүтээлийг Соёлын өвийн үндэсний төвийн мэргэжлийн хүмүүс сэргээн засварлаж, галерейн сан хөмрөгт өчигдөр хүлээлгэн өгсөн байна.  

Ташрамд дурдахад, Монголын уран зургийн галерейн сан хөмрөгт данстай эл бүтээлийг 1986-2020 онд Их тэнгэр цогцолборт бусад 17 зургийн хамт байршуулж байсан юм. Бүтээлүүдийг гадаадын зочид, төлөөлөгчдийг хүлээн авах байруудад түр байрлуулахаар 1986 онд шилжүүлснээс хойш 30 гаруй жил тэндээ байжээ.