Санхүүгийн зохицуулах хорооны тусгай зөвшөөрөл бүхий банк бус, санхүүгийн 534 байгууллага (ББСБ) өнгөрсөн жил үйл ажиллагаа явуулав. Энэ нь өмнөх оноос 0.4 хувиар өссөн үзүүлэлт юм байна. Нийт ББСБ-уудын 5.2 хувь нь гадаадын, 94.8 хувь нь үндэсний хөрөнгө оруулалттай аж. 2021 онд ББСБ-уудын нийт хөрөнгийн хэмжээ 2.7 их наяд төгрөгт хүрч, өмнөх оныхоос 703 тэрбум төгрөгөөр буюу 35 хувиар  өсжээ.

  Гадаад хөрөнгө оруулалт бүхий ББСБ-уудын 12 нь Японы, зургаа нь БНСУ-ынх бол АНУ, Их Британийнх тус бүр хоёр, үлдсэн нь Малайз, Хонгконг, Канад, БНХАУ зэрэг бусад улсын хөрөнгө оруулалттай аж. 2021 оны байдлаар ББСБ-уудын нийт хөрөнгө ДНБ-ий 6.9 хувьтай тэнцэж байжээ.

   Улсын хэмжээнд тусгай зөвшөөрлийн дагуу үйл ажиллагаа эрхэлж буй ББСБ-ын дийлэнх буюу 84.5 хувь нь Улаанбаатарт байна. Нийт зээлдэгчдийн тоо 1.7 сая буюу давхардсан тоогоор насанд хүрсэн 100 хүн тутмын 85 нь ББСБ-аас зээл авчээ.